یاد نہیں آوندا پیار کیہ ہوندائے

ایہہ نہیں میں کدے پیار نہیں کیتا
کیتا تے ہے
پرہن اُکا یاد نہیںآوندا
پیار کیہ ہوندائے
بڈھیپا وی کیہ ظالم چیز اے!
خیر کوئی اینا بڈھا وی نہیں ہویا
ہنے سٹھاں دا ہویا ہاں
اج وی جنے چاہواں جم سکنا ہاں
پر پیار کیہ ہوندائے
ہن اُکا یاد نہیں آوندا

خبرے بہتے کم کار دا آہرن اے
یاں پھیر ہو سکدائے
پیار دی لوڑ ای مک گئی ہووے!
اینا دتائے رب نیں
ہن میں پیار نوں کرنا وی کیہ اے؟
کس شے دی تھوڑ اے مینوں
جو ایویں سوچ سوچ کے ہولا ہوواں
پیار کیہ ہوندائے ؟
نہیں آوندا یاد تے نہ آوے
سبھ کجھ تے ہے جو بندے نوں لوڑیدائے
کاراں کوٹھیاں نوکر چاکر
ناں ناواں عزت منتا
ساری دنیا میرے ہتھ اِچ اے
کاہدی تھوڑ اے مینوں
جو میں گئے سمیاں دیاں
حرصاں یاد کراں!

بھریا اندر خالی

اک دن اوہ اندر آیا
اوہدی حیرانی حدوں باہر سی
اندرکجھ وی نہیں سی
اُکا کجھ نہیں
سکھنا خالم خالی
اوہ نس کے باہر آیا
باہروں مونہہ متھا تکیا
بالکل مونہہ متھا اوہدا ای سی
پھیر اوہ اندریں وڑیا
اکھیاں مل مل کے ویکھے
ایہہ کس طرح ہو سکدائے
اوہدے اندر کجھ نہ ہو وے؟

اوہ ہمیشہ ایہو سوچدا آیا سی
اوہدے اندر اک جہان اے
رنگ برنگا تے بے انت
زمین اسمان چن تار
شہراں دے شہر کرخانے تے کلا کاراں دے نقشے
قطب منارے سڑکاں موٹر کاراں
دریا سمندر باغاں وچ باغ
جنگل ون سونے پکھی پشو شینہہ مریلے
کیہ نہیں سی اوہدے اندر
پر ہن تکیوس تے نقشہ ای ہور سی
ایویں نکا جیہا کمرا تے خالی کندھاں
اک کندھ تے بس اک پینٹنگ لگی پئی سی
اوس نیڑے ہو کے اوہنوں تکیا
کونے وچ دستخط اوہدے ای سن
پر پینٹنگ خالی سی
اوہنوں اکا یاد نہ آیا
اوس کد ایہہ تصویر بنائی سی!
مطلب تصویر تے کوئی نہیں سی
بس فریم ای سی
اوس خالی اندر
جیس وچ اوہ کھلتا سی کلم کلا
بے انت پچھتاوے وچ ڈبا
اوہنوں ایڈا وڈا بھلیکھا کیویں لگا؟
کیوں اوہ ساری عمرے سمجھدا رہیا
جے اوہ نکونکیں پورا اے
جد کہ اوہ اصلوں خالی سی
اوس تصویر وانگ
جتھے اوہدے دستخط تے ہے سن
پر وچ کجھ نہیں سی
کیوں اوہنے اوتھے دستخط کیتے
جتھے اوہنے واہیا ای کجھ نہیں سی؟
کیوں؟
کوئی جواب نہ آیا
کدھروں کوئی جواب نہ آیا

نویکل بندے نال ملنا

اوہنوں اج تائیں
کوئی ایسا بندہ نہیں سی ملیا
جو اوہنوں پہلاں نہ کدی ملیا ہووے
ایس لئی اوہنے
بندیاں نوںملنا ای چھڈ دتا

اک دن اوس کول اک بندہ آیا
تے اوہنوں پچھدائے
کیہ ایہہ سچ نہیں
میں تینوں پہلاں کدے نہیں ملیا؟
اوس کول ایہدا جواب دین نہیں ہویا
بِٹربِٹر بس اوہنوں ویکھی جاوے
ویکھی جاوے
پر نہ نہ آکھیا جاوے
تے نہ ای ہاں

اوس بندے آپنا سوال دھرایا
کیوں ایہہ سچ نہیں
کہ میں تینوں پہلاں کدے نہیںملیا؟
ایہہ نہیں کہ اوہنوں سوال سمجھ نہیں آیا
سوال تے بالکل صاف سی
پر اوہ جواب کیہ دیوے؟
اوہدی ہر اک چیز
اوہدے آپنے نال ملدی سی
مونہہ مہاندرا ¾ قدکاٹھ ¾ ہڈ پیر
بولن ٹرن دا ڈھنگ
کجھ وی اڈرا نہیں سی
بھاویں سبھ کجھ سانجھا ہوندیاں وی
اوہ چوکھا سوہنا سی

بڑی کھیچل نال آخر آکھیوس
”میں اجے دس نہیں سکدا “
”کیوں توں کیوں دس نہیں سکدا
کیہ مشکل اے ایس سوال وچ؟“
”نہیں مینوں اک دن چاہیدائے
سوچن نوں“
”چنگا“ اوس سہجے نال آکھیا
”میں کل آواں گا“

اگلے دن اوہ نہیں آیا
خبرے اوہ نِرا بھلیکھا سی
پھیر وی اوہنے جان لیا سی
اوہ اوہنوں پہلاں نہیں سی
کدے ملیا
پر اینا فرق ضرور پیا
کہ ہن اوہ جیس بندے نوں وی ملدا سی
اوہنوں لگدا سی
اوہ اوہنوں پہلا کدے نہیں ملیا

میں نہیں مر سکدی

”میں نہیں مر سکدی“
”کیوں تو کیوں نہیں مر سکدی؟“
جواب نہ ملنا تے
اوہنوں ہور وی گرمی چڑھنی
اوس ایدھر اودھر انج پھرنا
جیویں ہنے بمب بن کے پھٹ ویسی
تے ایہنوں وی نال ای لے ڈُبسی
جیہڑی ہر روز سر چڑھ کے
اوہنوں آہندی سی
”میں نہیں مر سکدی“

کج چر مگروں پھیر اوتھوں ای گل ٹرنی
”میں نہیں مر سکدی“
”پر کیوں نہیں مر سکدی
کیہ سوچ کے توں
ایڈے دعوے کرنی ایں؟“
ہسدیاں ہسدیاں کہندی اے
”کیہ سوچ کے؟“
”ہاں کیہ سوچ کے؟“
پھیر ہسی جاوے
”توں قیدی ای نہیں
کملا وی ایں
سگوں اصلوں اجبک
اوئے بھلیا لوکا
کئی گلاں اجیہاں ہوندیاں نیں
جو دھروں سچیاں ہوندیاں نیں
اوہناں نوں کسے ثبوت دی
مُتھاجی نہیں ہوندی
ایہناں سچاں وچوں
دُھروں وڈا سچ ایہہ ہے کہ
میں نہیں مر سکدی“
اوہ چپ سی تے حیران
حیران اوہدے یقین تے
کیویں یقین سی اوہنوں
پئی اوہ نہیں مر سکدی
پھیر سوچن لگا
کدے مینوں وی ایہنا ای پک ہوندا
آپنی کھل اُتے

”تینوں لگدائے
توں میری قید اچ ایں؟“
”لگدائے دا کیہ مطلب اے؟
توں ہر پاسیوں مینوں ولی بیٹھی ایں
پھیر’ لگدائے ‘ دا کیہ مطلب اے؟“
”ایہہ فرق اے تیرے ویکھن دا“
آکھن لگی
”ولیا تے میں ہر اک نوں اے
جیہڑا ایس دنیا وچ لتھا اے
پر ایہہ اچرج گل اے
پئی ایہہ دِسدا بس تینوں ایں
ایس لئی میں آہنی آں
ہو سکدائے
ایہ تیرا بھلیکھا ہووے ایویں“
”مینوں پک اے
توں ہر اک نوںایہو آہنی ایں؟“
میری سنی ان سنی کیتوس تے
تھوڑا چر چپ رہون مگروں آہندی اے
”تیرا بھلیکھا
مینوں دکھدا سر پر اے
میرے ولن اچ کوئی ڈھل رہ گئی
جو تینوں لگدائے جو لگدائے
پر ایہدا ایہہ مطلب نہیں
جو میں مر سکدی ہاں
تیرے یاں کسے وی جی دے ہتھوں
جیہڑا ایس دھرتی تے جیوندا اے
میں روح آں تیری
تے ہر جی دی
جو ایس دھرتی تے جیوندا اے“
اوہ تڑفدا سی
ایہہ گلاں سن کے
کیویں اوہ اوہدی روح دی
تھاں لئی بیٹھی سی
تے انج پئی دعوے کردی سی
جیویں اوہ ای اوہدی روح اے

اوہ میں ہاں*

ہر واری جد اوس ملنا
اوس پچھنا:
اوہ کون اے؟
تے ہر واری میں دسنا
اوہ میں ہاں
پر اوس میری سنی ان سنی کرنی
تے آپنی راہ لینی
جیویں مینوں خبر ای کجھ نہیں
آخرپچھلی واریں جد انجے کیتوس
میں متا پکایا ایہنوں دسن دا پئی
۔۔۔۔۔۔۔۔۔۔۔۔۔
* اُپنشداں وچ کُل دی اصل یاں کُل دی اکائی نوں ”اوہ میں ہاں“ یا ”نہ اوہ، نہ ایہہ“ کہہ کے بیان کیتا گیا اے۔
اوہ کون اے؟
سو ایتکی جیویں ای پچھیوس
اوہ کون اے؟
میں دتی اک ٹکا کے
کوئی دس گز پرانہہ جا ڈگا
انج جیویں ککھاں دا کوئی باوا ہووے

خیر ¾ اکدم اٹھ کھلوتا
کپڑے لیڑے جھاڑیوس
تے میرے ول انج ویکھے
جیویں آہندا ہووے
ایہہ توں چنگا نہیں کیتا
کیوں ¾ میں کیوں چنگا نہیں کیتا؟
بھئی سو واری تینوں دسیا اے
اوہ میں ہاں
پھیر توں کیوں مڑ مڑ مینوں پُچھنا ایں
اوہ کون اے؟
میرا خیال اے
بالکل سمجھ نہ آئیوس
تے آپنی راہ پھڑیوس
کل شاماں دی گل اے
پھیر میرے متھے آلگا
تے پھیر اوہو سوال چا دھریوس
اوہ کون اے؟
میں دیر نہیں لائی اکا
جھبدے پھڑیا والاں توں
لائی چمڑی اپروں تھلے تائیں
تے وچوں چیر کے دو کیتا
پھیر دو توں چار
تے پھیر پھیتی پھیتی کر کے کھنڈ پُھنڈ چھڑیا
جویں ککھاں دی مُٹھ نوں پنجیا ہووے
کسِے تگڑے دانداں دی جوڑی نے
ہن تے سمجھیں گا
اوہ کون اے؟
میں آکھیا
یاں اجے وی سمجھ نہیں آئی؟

ہن بیٹھا سوچدا ہاں
جے اوہ میں نہیں ساں
تے کون سی اوہ؟
تے جے اوہ میں ای ساں
تے پھیر اوہ کیوں میتھوں مڑ مڑ پچھدا سی
اوہ کون اے؟

آخری پتر

ہن دیری تھی گئی اے
میرے جاون دا ویلا پیا ہوندائے
میں تینوں نہیںمل سکیا
میرا کائی گلا نہیں
توں مینوں نہیں ملی
تیرا کوئی گلا نہیں
پر ایہہ سوچن حق اے
کہ پھیر آون دا موقع ملیا
تے اک دوجے نوں گولاں گے
جے مل پئے
تے اکائی دا اوہ چسکا ویکھاں گے
جو ایس واری
ہتھاں چوں سرک گیا

وڈا بندہ

بڑے وڈے بندے سن جی اوہ
ماشاءاللہ
بڑے وڈے بندے سن اوہ
ایڈے وڈے کہ
اک پتلون اِچ پورے نہیں سن آوندے
کہندے نیں
اوہ دو پتلوناں تے دو ای شرٹاں وچ
مساںفٹ بیٹھدے سن
کئی مونہہ سن اوہناں دے
تے ہر اک وچوں
کجھ نہ کجھ اندر سٹدے رہندے سن
متاں کوئی پاسا
خالی نہ رہ جائے وڈیائی دا

بوتل وچ مکان

میں بوتل کھولی
تے اوہنوں آکھیا باہر آون نوں
اوہ ڈر کے ہور وی تھلے بیٹھ گیا
تے الٹا مینوں آکھے
اندر آون نوں،
اکھے باہر خطرہ اے

کاہدا خطرہ اے باہر ؟
میں باہر ہاں
تک کیہ ہویائے مینوں؟
اکھے نہیں
تینوں اُکا خبر نہیں
جے ہوندی تے باہر نہ ہوندا
نہیں منیا
جدکُرلاوان ترلے پاون نہ رکیا،
میں اوہدا ڈھکن
اوہنوں پرتا دتا

تاﺅ

سِک چھڈ دے
تاں مل پوسیں
سِکدا رہسیں
تاں سِکدا رہسیں
سکھناتھی پﺅ
اصلوں سکھنا
اینا کہ ہلیں
تاں سار نہ تھیوے توں ہلیا ایں
اٹھیں تاں خبر نہ تھیوے توں اُٹھیا ایں
پتھر تھی پﺅ
تے رُڑھ پﺅ پانی وانگوں
کوئی آکھے توں پتھر
کوئی آکھے توں پا نی
نہ کوئی سچا
نہ کوئی جھوٹا

گول گواہ
جو سونہہ چاہوے سچے قران دی
توں ہے سیں
پرہن کوئی نہ
پھیر خبرے
ہاں کن کھول کے سن گھن
پھیر خبرے اوہ مِل پﺅ
پھیر خبرے اوہ مل پﺅ
نہ مِلیا
تاں کوئی نہیں
اوس دن تاں سچا تھیسیں
جد سارے اُٹھسن
تے اوہ آپی پچُھسی
کِتھائیں اے اوہ شوہدا کملا
جو سُچیندا ہا ہر پل مینڈا
پر ویکھ نہ سکداہا
میں آپ توں وکھرا
اج تائیں کیں کُوں ملیاں؟

حال دی خبر

خبرے کون اے اوہ
جیہڑا ہر روز
میرے دِل دے کولوں دی
ہو کے لِنگھدا اے
اینا کولوں
کہ ناﺅں پُچھاں اوسدا
تے اوہ آکھ نہ سکے نہ

خبرے کون اے اوہ
جیہڑا ہر روز
میرے دِل دے کولوں دی
ہو کے لنگھدا اے
اینا کولوں
کہ ہتھ لاونا چاہواں
تے اوہ آکھ نہ سکے نہ

خبرے کون اے اوہ
جیہڑا ہر روز
میرے دل دے کولوں دی
ہوکے لنگھدا اے
اینا کولوں
کہ نال بٹھانا چاہواں
تے اوہ آکھ نہ سکے نہ

خبرے کون اے اوہ
جیہڑا ہرروز
میرے دِل دے کولوں دی
ہوکے لنگھدا اے
اینا کولوں
کہ اوس توں اِک ساہ منگاں
آپنا جُثہ سجرا رکھن نوں
تے اوہ آکھ نہ سکے نہ

خبرے کون اے اوہ
جیہڑا ہر روز
میرے دِل دے کولوں دی
ہوکے لنگھدا اے
اینا کولوں
کہ ہولی جیہی وی آکھاں ’ہاں‘
تے اوہ آکھ نہ سکے نہ

چوراں دا ڈیرہ

شہراں وچ چوراں دا ڈیرہ
ڈیرے وچ لِشکن ون سونیاں لُٹاں
تے نالے چمکن چوراں دے رنگ
اِک دوجے نوں پاون جپھیّاں
ہسّن کھیڈن تے اِک دوجے نوں پُچھن
ایہہ کیویں ہویا ؟
ایہہ کیویں ہویا؟
ہولی ہولی ایہہ تن اکھرنکلے ڈیریوں باہر
تے کھنڈ گئے
مالھیاں گلیاں وچ
تے سڑکاں تے محلاں وچ
تے کرخانیاں تے ٹی وی سٹیشناں وچ
تے وڑ کے لہہ گئے
ریلاں ¾ بساں تے کاراں وچ تے جہازاں وچ
سمندراں اتے ہواواں وچ
ہر تھاں ہر پاسے
اکو سوال سی
ایہہ کیویں ہویا؟
ایہہ کیویں ہویا؟
کیویں بن گئے والی سبھ دے
چور اچکے
ہر کوئی آکھے
اوہ چور پیر اے میرا
کوئی آکھے
اوہ چور ماما اے میرا
مشکل پے گئی
تھوڑے چور تے بہتے چیلے
کلا بش تے بہتے لیلے
کر لﺅ ترقی
بن جاﺅ یورپ
چورو چور بلّے بلّے
چور و چور
اسیں سارے چور

رانجھا جوگی

کدیں گم جاندائے
کدے لبھ پیندائے
جے گم جاوے
تے روندا نہیں
جے لبھ پوے
تے ہسدا نہیں

کدیں مر جاندائے
کدیں جی پیندائے
جے مر جاوے
تے گمدا نہیں
جے جی پوے
تے لبھدا نہیں
جد ویکھو
تے ستا ہوندائے
نہ ویکھو
تے جاگدا ہوندائے
جے ستا ہووے
تے مردا نہیں
جے جاگدا ہووے
تے جیندا نہیں

کوئی کہندا اے
بال اے کھیڈن دیو سو
تہانوں کیہ کہندائے؟
کوئی آہندائے
باندر اے
نہ چھیڑو سو
تہاڈا کیہ لینداے؟
اوہدی کوئی سندا نہیں
سنیے وی تے کیہ
مونہہ وچ جیبھ ہووے تے بولے
پر بولے تے سندا نہیں
سندائے تے بولدا نہیں
کدی لگدائے
بھاویں ایہہ جی ای ہووے
سبھ ورگا
پر جے ایہہ ہے سبھ ورگا
پھیر سبھ ورگے کاہدے نیں؟
انج سر تے سِنگ تے کوئی نہیں سو
پر جے کدی ہوندے
تے کنا چنگا سی
خبرے پتا تے لگدا
کون اے ایہہ؟

اک رانجھا مینوں لوڑیدا

بس اک مولا مل جائے مینوں
ہور نہیں کجھ لوڑیدا
بس اک مولا مل جائے مینوں

میں انجانی جگیانی
میں کیہ جانا
ہور کیہ لوڑیدا
بس اک مولا مینوں لوڑیدا
نہ دسیندا ‘ نہ سنیندا
نہ بلیندا ¾ نہ ستیندا
نہ رُسدا ¾ نہ منیندا
پھیر وی اوہو مینوں لوڑیدا
اوہو جیہنوں اوہو سارے آہندے نیں
اوہو مینوں لوڑیدا

روندی روندی گھٹدی ہاں
گھٹدی گھٹدی مردی ہاں
نہ ولاﺅ نہ پرچاﺅ
نہ ایویں گلیں لاﺅ
اوہ آوے یاں نہ آوے
اوہدی تھاویں کوئی لاہ آﺅ مینوں
بس اک اوہ مل جائے مینوں
پھیر ہور نہیں کجھ وی لوڑیدا
بس اوہو مینوں لوڑیدا
جیہنوں سارے اوہو اوہو آہندے نیں

ناٹک دنیا

اوہ مرے بندے دی
بڑی منتا کردے سن
ایس بھلیکھے وچ بڑے بندے
آپنی جان گنوا بیٹھے سن
جیہناں وچوںاک میں وی ساں
پر مینوں حیرانی تد ہوئی
جد اوہناں سبھ مویاں وچوں
میری منتا شروع کر دتی
ایہناں نوں چوکھا بھلیکھا لگا اے
میں سوچیا
ایہہ مینوں کوئی ہور سمجھی بیٹھے نیں
بہتر ایہو اے
میں دس دیاں ایہناں نوں
بھئی میں کوئی ہور ہاں
یعنی میں مریا نہیں
میں جیوندا ہاں
میں ایویں
مرن ڈراما کیتا اے
پر اوہ بالکل بھیڑے نہ پئے
اکھے بھلیکھا سانوں نہیں
تینوں لگا اے
ایہہ دنیا ناٹک نہیں تے کیہ اے؟
اسیں جیندے ہوندے
تے مویاں دی منتا کیوں کر دے؟
تے توںجیندا ہوندا
تے منتا دی ریجھ اِچ
مرن ڈراماکیوںکردا؟

پھیر اوہو سوال

میں جد اوہنوں ملن نوں آیا
مینوں دسیو نیں
اوہ گم چکیا اے
گم چکیا اے؟
کیہ مطلب ایہدا؟
کیہ مطلب ایہدا دا کیہ مطلب؟
اوہ آکھن لگے
اوہ کافی چر دا گم چکیا اے
تے کسے نوں خبر نہیں اوہدی