بھریا اندر خالی

اک دن اوہ اندر آیا
اوہدی حیرانی حدوں باہر سی
اندرکجھ وی نہیں سی
اُکا کجھ نہیں
سکھنا خالم خالی
اوہ نس کے باہر آیا
باہروں مونہہ متھا تکیا
بالکل مونہہ متھا اوہدا ای سی
پھیر اوہ اندریں وڑیا
اکھیاں مل مل کے ویکھے
ایہہ کس طرح ہو سکدائے
اوہدے اندر کجھ نہ ہو وے؟

اوہ ہمیشہ ایہو سوچدا آیا سی
اوہدے اندر اک جہان اے
رنگ برنگا تے بے انت
زمین اسمان چن تار
شہراں دے شہر کرخانے تے کلا کاراں دے نقشے
قطب منارے سڑکاں موٹر کاراں
دریا سمندر باغاں وچ باغ
جنگل ون سونے پکھی پشو شینہہ مریلے
کیہ نہیں سی اوہدے اندر
پر ہن تکیوس تے نقشہ ای ہور سی
ایویں نکا جیہا کمرا تے خالی کندھاں
اک کندھ تے بس اک پینٹنگ لگی پئی سی
اوس نیڑے ہو کے اوہنوں تکیا
کونے وچ دستخط اوہدے ای سن
پر پینٹنگ خالی سی
اوہنوں اکا یاد نہ آیا
اوس کد ایہہ تصویر بنائی سی!
مطلب تصویر تے کوئی نہیں سی
بس فریم ای سی
اوس خالی اندر
جیس وچ اوہ کھلتا سی کلم کلا
بے انت پچھتاوے وچ ڈبا
اوہنوں ایڈا وڈا بھلیکھا کیویں لگا؟
کیوں اوہ ساری عمرے سمجھدا رہیا
جے اوہ نکونکیں پورا اے
جد کہ اوہ اصلوں خالی سی
اوس تصویر وانگ
جتھے اوہدے دستخط تے ہے سن
پر وچ کجھ نہیں سی
کیوں اوہنے اوتھے دستخط کیتے
جتھے اوہنے واہیا ای کجھ نہیں سی؟
کیوں؟
کوئی جواب نہ آیا
کدھروں کوئی جواب نہ آیا