اوس جدوی ملن آونا
کدی پھل کدی بسکٹ
کدی کجھ ہور لئی آونا
اک راتیں آیا
تے کنے ای بھکانیاں دا گچھا
چکی آوے
ایہہ کیہ ؟ میں ہس کے پچھیا
اندر آون دا اشارہ کیتوس
جیویں میں آیا ہوواں اوس کول
بھکانے خریدن نوں
اندر بیٹھے تے دسیوس:
رستے وچ اک بندہ بھکانے لئی کھلوتا سی
میں ایویں کھلو کے پچھیا
کد دا کم تے کھلتا ایں؟
کہنداے دس گھنٹے ہو گئے نیں
اگے ستاں اٹھاں وچ سارے وک جاندے نیں
اج خبرے سکولاں وچ چُھٹی اے
بال ای کوئی نہیں دسیا
مینوں لگا
میںپہلا بال ساں
جو اوہدے متھے لگا
میں اوہدے سارے ای بھکانے خرید لئے
سوچیا اوہ گھر تے ویلے سر اپڑے
تے اوہنوں ویسے ای
اونے پیسے دے آوندا!!
میں آکھیا،
پھیر اوہنے
گھریں ویلے سِر کیویں جانا سی؟
آکھن لگا
تے اسیں ایہناں نوں
ہن کیہ کریے ؟ میں ہس کے پچھیا
کھیڈاں گے
پھیر اکدم اک بھکانا میرے
مونہہ اگے کیتوس
تے خبرے کیہ کیتا سو
کہ بھکانا پاٹ گیا
میں تربک کے پچھے ہٹیا
تے ہس کے کہندائے
کھیڈن وچ مزا تے آوندائے نا