اینے بڈھے
اوس اک سار
پہلے کدی نہیں سن ویکھے
پچونجا سٹھ توں گھٹ کوئی اک آدھ ای سی
وادھو کافی سن
کوئی ٹاواں کالا وال بے شک ہووے
چٹے چار چوپھیرے سن
کوئی موٹا کوئی دوہرا
کسے توں ٹرن نہ ہووے
مرض بماریاں دوائیاں دیاں گلاں
کسے نوں شوگر دل دے دورے
کسے نوں ساہ کھچ کھچ کے آوندائے
کسے نوں بلڈپریشر کئیاں دے اک
کئیاں دے دو کئیاں دے تن اپریشن
کجھ کول ڈاکٹراں بھانے
بہتا ویلا کوئی نہیں سی
اوہ بیٹھا سوچے
میں ایتھے ایہناں وچ کیہ پیا کرنا ہاں؟
کنی واری متا پکائیوس
ایتھوں نکلاں
جاواں آپنے ہانیاں وچ
جیہناں نوں کد دا چھڈ آیا ہاں!
ایہو سوچاں سوچدیاں
اک دن اوہنے
موت آپنے کولوں لنگھدی ویکھی
اگے پچھے تکیوس
ہور تے اوتھے کوئی نہیں سی
پھیر اوہ اوس کولوں دی
ہو کے کیوں لنگھی؟
ہو سکدائے اوسے لئی ای آئی ہووے؟
تیاری کر لینی بہتر اے
آپنے آپ نوں آکھن لگا
بڈھیاں نے وی ایہو صلاحیا
بھئی جے توں ویکھی اے
تے ٹھیک ای ویکھی ہونی اے
ایس وچ کیہ اچرج گل اے آخر
جد اوس چلانا کیتا
مدتاں تائیں لوکیں آہندے رہے
اوس جیہی اج تائیں کسے نہیں جالی
اوہ پورا ہوکے
پورا ہویا
