ہُن اوہ ایس دنیا وچ نہیں اے
پر اودوں کیہڑا ہے سی
جد اوہ ہے سی
جدوں سویرے اٹھنا
اوس خود توں پچھنا
کون اے توں؟
نھیری جُھلنی
دن ڈبنا
رات مکن تے آونی
اوس اڈیکدیاں رہنا
پر کوئی جواب نہ آونا
کوئی جواب نہ آونا
سڑک تے ٹردیا ہونا
پچھوں ہارن وجنا
اوس اک پاسے ہونا
کوئی بس کار یا ٹانگہ
کولے آکے رکنا
تے اوہنوں پچھنا
کون ایں توں؟
اوس آل دوالے تکنا
اوتھے دوجا کوئی ہور نہ ہونا
سورج دی گرمی ودھنی
تے کلاّ اتھرُو ڈِگنا
پر کوئی جواب نہ آونا
کوئی جواب نہ آونا
اوہ آخری رات سی اوہدی
اوہو سفنا آیا
جیہڑا ہمیشہ آوندا سی
تے پچھدا سی
کون ایں توں؟
اوہو مڑھکا آیا
سُتے تّارے اٹھے
تے اوہ وی اٹھ بیٹھا
پانی دا گھٹ پیتوس
تاں سفنے توں پچھن لگا!
کہیو جیہا سوال اے ایہہ
جیہدا جواب ای کوئی نہیں!
جیہدا جواب ای کوئی نہیں!
زمین ہلّی
پچھلے جنماں دے دروازے کھلے
اوہ نس کے اندریں جاوڑیا
پر کوئی جواب نہ آیا
کوئی جواب نہ آیا
ہُن اوہ ایس دنیا وچ نہیں اے
پر اودوں کیہڑا ہے سی
جد اوہ ہے سی
