سورج اوس پاسے سی
میں ایس پاسے
بس کجھ تارے نال سی میرے
بے شک گھپ ہنیرا سی
پر اوہناں دا چانن اکھیاں لئی کافی سی
خبرے کنا چر
اوس مٹھی مٹھی لو وچ
اسیں کھیڈے ملے
مدھ پیتی مزے کیتے
لکن میٹی
کدی اپر کدی تھلے
کدی آسے کدی پاسے
کدی مڑھکے کدی ہاسے
کدی ادھ پجدے اکھر
کدی بھکھدے ساہواں چوں سرکن مٹھیاں آہاں
میں جد دا اوہناں نوں چھڈیا سی
اوہ پہلی واری آئے سن
اک مدت میں راہواں تکیاں سن
کنے ای پتر گھلے بجلی کڑکی
کنے ای بدل وسے
سمندراں وچ چڑھ گیا پانی
دور دراڈے ملکاں دے مل گئے لوکیں
پھیر کدھرے اوہ آئے سن
اوہ نہیں سن مندے
میرا من ایس دھرتی تے رہنا لوچدا سی
اوہناں بھانے
سورج دے چانن نے
میری کملی اکھ ولائی سی
ہسدے سن
اکھے دس توں کیہ کھٹیا
ایس پکے ہرجائی
نو رناں دے محرم توں؟
چوری دی رات پئی جاندی سی
سورج دے پرتن دا ویلا پیا ہوندا سی
تے اوہناں جانا سی
واپس میرے وطناں نوں
اسیں گل لگ کے روئے
اوہ آکھن آکھن نوں کر دے رہے
میرے پرتن نوں
پر آکھ نہ سکے
خبرے میں جانا سی کہ نہیں
پر من چاہندا سی
اک واری اوہ آکھن
