اوہ پاگل

اوہ کہندے سن ایہہ پاگل اے
ایہہ لمیاں سوچدا رہندا اے
اوہ آہو آہو کہندا سی
ہاں میں پاگل ہاں
ایہناں سوچاں چوں
اوہ سورج ورگے پھل کھڑنے نیں
جیہناں دے سر تے
ایس جگ نے پلنا اے
اوہ ہسدے سن
تے کہندے سن
ایہدیاں لمیاں سوچاں نیں
ایس پاگل دا کیہ بننا ایں!

پھیر اوہو ہویا جو اوہ کہندا سی
رات دا پچھلا پہر سی
تے اوس پہر دا آخر نہ ہون تے آئے
اوہ آئے تے آکھن لگے
کتھے نے اوہ سورج ورگے پھل
تیریاں سوچاں دے
جیہناں دے سر تے ایس جگ نے پلنا اے
اوہنے بکل کھولی
اوہ پچھے ول ڈگے
اوہ چانن ہویا جو کدے نہ ہویا سی
سنبھلن پچھوں اوہنوں ڈھونڈن لگے
پر اوہ نہ لبھدا سی
لبھ لبھ کے سب پاگل ہوئے
چانن ودھدا جاندا سی
پر اوہ پاگل کتے نہ دسدا سی