مرن پچھوں دی ورتی

میں جد واپس آیا
اوہ سارے میرے آل دوالے ہوئے
تے آکھن لگے
دس توں کیہ کھٹیا وٹیا ایس جیون توں
دس توں کیہ کھٹیا وٹیا ایسے جیون توں
میرے کول اک پنڈ سی وڈی
میں پھلیا پھنڈیا آیا ساں
سوچدا ساں
ایہناں نوں کڈھ کڈھ دساں گا
اک اک ورتی
تے پھیر ویکھاں گا
ایہہ کیویں پچھدے نیں
دس توں کیہ کھٹیا وٹیا ایس جیون توں
اوہ ٹھہرو تے سہی
میں آکھیا
دو گھڑی بیٹھن تاں دیو
پھیر دسناں ہاں سب کھٹیا وٹیا
کوئی چاءپانی کوئی دوا دارو پچھو
آخر اینیاں عمراں گال کے
آیا ہاں
کوئی ایڈی وی کاہلی نہیں سی مینوں پرتن دی

خیر
چاءپانی پیتا
پر جد میں آپنی کنڈ نوں تکیا
میری پنڈ اوتھے کوئی نہیں سی
میں تربک کے پچھے نوں نسیا
اوتھے بوہا کوئی نہیں سی
تھلے تکیا
میرے پیراں ہیٹھاں کجھ نہیں سی
اوہ آکھن
دس کجھ سانوں
اساں تے سمجھے ساں
لبھن گولن دی دنیا توں لنگھ آیا ایں
پر مینوں صبر نہ آوے
دل کِریا
اوہ میتھوں میں اوہناں توں لُکیا

پھیر خبرے کد
میں اکھیاں کھولیاں
اوہ سارے میر ے آل دوالے بیٹھے سن
اچن چیتی میں اٹھ بیٹھا
اوہ سارے دے سارے
اک اک جی
میری ای پنڈ چوں نکلی واپری
دی صورت سی
جیہڑی مینوں ای پئی پچھدی سی
دس ایس لمے جیون چوں
توں کیہ کھٹیا وٹیا