نہ ہوون دا ڈر

جیس دن میں ڈر نوں تکیا
میں آپنے آپ نوں پچھلے پیریں
ڈھلان تے رُڑھدے پانی وانگ
سُندیاں تکیا
پر میں نس نہیں سکیا
اوس مینوں پھڑ کے
میرے وزنوں انج خالی کیتا
جیویں اک چوں اک کڈھیے
تے صفرا بچدا اے
میں آپنے آپ نوں
اوس ڈھلان اچ رُڑھدے پانی وچ
رُڑھدا تکیا
تے اگے
کالک نال بھریا بے انت سمندر
جتھے چانن ڈگے
تے انج گم ونجے
جیویں اوہ سورج چوں نہیں
کسے دیوے دی
بجھی لاٹ چوں آیا ہووے
کنا ای چر مینوں لگا
میں کوئی نہیں ہاں
میں ٹریا تے ساں
گھٹ ودھ سارا کجھ ای سی
پر ہن کوئی نہیں ساں

میں اکھ جھپکن دی کوشش کیتی
اکھ کوئی نہیں سی
میں ہتھ ودھایا
ہتھ کوئی نہیں سی
میں ساہ کھچیا
ساہ کوئی نہیں سی
میں دو ہویا
پھیر پاٹ کے چار
پھیر سولھاں پھیر چونٹھ
پھیر اینے ان گنت
کہ مینوں میرے کُل
دا نقشہ وسر گیا
نہ میں اوتھے ساں
نہ میں دا چیتا باقی سی