سقراط

اوہ آپنے خیالاں نوں گُنھدا رہندا سی
چنگی طرح گُنھ کے
اوہناں نوں اگ تے دھردا سی
تے پھوکاں مار کے اگ بھڑکاندا سی
پھیر آل دوالے جیہناں وی بیٹھے ہونا
اوہناں نوں دیندا سی تے کہندا سی
ایہہ لﺅ کھاﺅ
تے اتوں پیو کٹورا پانی دا
اوہناں نے کھانا
تے کھا کے نچنا
نچدیاں نچدیاں
نہ اوہناں نے رکنا نہ اوہناں نے تھکنا
پر فجر دے آون تائیں
اک اک کر کے ڈگدیاں جانا
اوہنے کلیاں رہ جانا تے کہنا
میں نچ کے سورج یار نوں ملنا اے
پھیر پولے پیریں سورج نے دھرتی تے آونا
نچدے نچدے نوں گل نال لاونا
تے اوسے پیریں ٹر جانا